Exhibición de Videira en Cariño e triunfo final de Martín na xeral da Volta Ciclista Galicia

O corredor portugués arrincou na subida final e presentouse en solitario na liña de meta. Álex Martín xestionou as diferenzas para conquistar a camisola amarela.


Todo empezou cando o equipo Gomur decidiu romper a unidade e meter a cinco dos seus corredores nun corte de 20 ciclistas. Tanto Fran Agea como Ángel Coterillo estaban nunha escapada onde colleron a responsabilidade. Seguindo este movemento, tamén se filtraron diante Ramón Fernández (Froiz), Pablo García (Caja Rural), Patrick Videira (Fortunna Maia) ou Álex Martín ( EOLO Kometa), segundo da xeral ao comezo da etapa.

As diferenzas, ante a falta de entendemento no pelotón, foron aumentando ata superar os 2 minutos e medio. Por detrás, tanto Vigo Rías Baixas como Cortizo emprenderon un pulso con Gomur, ao que só Caja Rural axudou na cabeza de carreira.

Superada a subida da Faladoira, xa camiño da parte decisiva, empezaron a reducirse as distancias. A pé da última subida a Herbeira, a desvantaxe era tan só de 1 minuto.

Moveuse Videira en busca dos puntos da montaña e abriu 20 segundos, soñando coa etapa. Por detrás, seleccionouse o grupo con Coterillo, García e Martín que deixaron ao resto de fuxidos.

Co pelotón sen opción, Videira mantivo a súa diferenza nas ramplas máis duras, mentres Martín loitaba con García pola xeral. A carreira chegou á cima de Herbeira aínda por decidir. No descenso, consolidouse a vitoria de etapa do portugués mentres que Martín puido xestionar as diferenzas e entrar en meta en segunda posición como vencedor final da Volta Ciclista Galicia.

No podio final, Martín superou por 20 segundos a Videira, mentres que Tercero puido reter a terceira posición. Jorge González (Gomur) certificou a vitoria nas Metas Volantes, Rubén Fernández (Retelec Alca) subiu ao podio como mellor galego e Videira fixo o propio coa montaña. Entregaron os premios José Miguel Alonso, alcalde de Cariño; Jonathan Miranda, concelleiro de Deportes de Cariño; Francisco Breijo, presidente do Club Ciclista Cariño; Antonio Rodríguez Cid, tenente xefe do dispositivo da Garda Civil neste evento; Jacobo Ucha, técnico da Federación Ciclismo Galego; e Ezequiel Mosquera, excorredor profesional.

Noutro acto protocolario desta xornada, Rafael Coca, presidente do Comité Técnico de Árbitros Nacional, fixo entrega durante o corte de cinta das camisolas conmemorativas aos árbitros homenaxeados Sinesio Vázquez e José Luis Padín, que afrontaron a súa última carreira.

A competición en homenaxe a Guillermo Sande puxo así punto a final coa organización da Federación Ciclismo Galego e un excelente espectáculo deportivo dos equipos participantes.

No descenso, consolidouse a vitoria de etapa do portugués mentres que Martín puido xestionar as diferenzas e entrar en meta en segunda posición como vencedor final da Volta Ciclista Galicia

#voltagalicia #ciclismogalego

17 vistas0 comentarios