SAÚDAS

Ata o ano 2000 Galicia contaba cunha volta ciclista profesional. Aquela Volta a Galicia traía á nosa comunidade os mellores corredores do panorama mundial e, dese xeito, quedaron gravados no historial de campións os nomes de xenios da bicicleta como Teteruiouk, Vandenbroucke, Serrano, Olano ou o mesmo Indurain.

 

Hoxe Galicia non ten unha volta, ten tres. A aparición dunha das mellores voltas profesionais que existen arestora no circuíto, O Gran Camiño, permite que a súa nómina de campións con tan só tres edicións disputadas sexa xa unha recompilación de lendas do ciclismo como Alejandro Valverde e Jonas Vingegaard. A esta competición de catro etapas súmaselle a Vuelta a España que, dende hai unha década, converteu a Galicia nunha das súas obrigadas zonas de paso, chegando neste 2024 a un récord de etapas galegas, pois unha das tres mellores roldas ciclistas do mundo pasará catro das súas xornadas na nosa terra.

 

Pero ademais destas voltas profesionais, Galicia conta cunha proba de toda a vida. A Volta a Galicia da categoría elite sub23 chega a súa vixésimo segunda edición amosando que está en plena forma:  126 corredores de 18 equipos; 200 persoas de equipo ou máis dun cento de persoas de organización, son algunhas das cifras dunha proba que, do 12 ao 15 de setembro pasará por un total 26 concellos galegos. Sen esquecer ás forzas e corpos de seguridade e servizos de emerxencia que garanten en cada proba deste tipo que todo saia sen incidencias e, por suposto, ao traballo da federación.

 

Sarria, O Páramo, Láncara, O Corgo, Lugo, Castroverde, Baralla, Samos, Xinzo de Limia, Trasmiras, Cualedro, Baltar, Calvos de Randín, Muíños, Bande, Porqueira, Sarreaus, Sanxenxo, Meaño, Ribadumia, Vilanova de Arousa, Vilagarcía de Arousa, Caldas de Reis, Portas, Meis e Poio serán os municipios testemuñas desta gran festa do ciclismo galego.