SAÚDAS

A Volta a Galicia percorrerá un ano máis a xeografía lucense. Desde a Vicepresidencia da Deputación de Lugo renovamos o apoio á proba, apostando de novo polo ciclismo como plataforma para amosar a riqueza natural e patrimonial do territorio e polo impulso do tecido deportivo afeccionado e profesional ao redor desta disciplina en Galiza.

Este ano a sede lucense da Volta será o concello da Pobra do Brollón, situado a medio camiño entre a Ribeira Sacra e O Courel, que ofrece unha mestura de paisaxes vitícolas e de montaña e conserva un importante patrimonio arqueolóxico e etnográfico.

A Pobra do Brollón será o punto de referencia das dúas primeiras etapas da proba, saída e meta das dúas primeiras xornadas, unha crono de 7 quilómetros nos límites do propio concello o 14 de setembro, e unha etapa de 148 quilómetros que levará os ciclistas tamén polos municipios de Sarria, O Incio e Bóveda, con portos de primeira, segunda e terceira categoría, o 15 de setembro.

As estradas lucenses deixarán pois pegada na clasificación xeral da Volta a Galicia, o grande escaparate galego para ciclistas de categorías elite e sub 23.

​