SAÚDAS

    O 7 de setembro de 2009, un corredor cun maillot branco con pingas azuis chegaba en solitario á meta da novena etapa da Vuelta a España, con final en Xorret de Catí, na Comunidade Valenciana. Ese maillot levaba impresionado no peito dous emblemas, o primeiro, o logo do Xacobeo Galicia 2010, que ademais era o nome do equipo galego profesional de ciclismo creado pola Xunta de Galicia en 2006; o segundo, a coñecidísima marca ‘Galicia calidade’, tamén impulsada polo Goberno galego, que neste caso, facía referencia ás pernas do deportista que estaba enriba da bicicleta.

    O 7 de setembro de 2009, Gustavo César Veloso acadaba o seu maior triunfo nunha das tres grandes roldas do ciclismo internacional. Pero o seu palmarés tamén conta con numerosas vitorias de etapa en diferentes competicións e, sobre todo, dúas vitorias xerais na Volta a Portugal, unha Volta a Cataluña e un Tour de Río.

    Que a Volta a Galicia renda homenaxe a un dos mellores ciclistas da historia de Galicia non é algo novo. Anteriormente tamén foron galardoados Ávaro Pino, gañador da Vuelta a España en 1986; Óscar Pereiro, gañador do Tour de Francia en 2006; Jesús Blanco Villar, con vitorias na Volta a Galicia, Vuelta a Valencia e Vuelta a España; José Ángel Vidal, campión da Vuelta a España por equipos en 2000; ademais dos tristemente falecidos Guillermo Sande, seleccionador galego, e Magín Froiz, impulsor GD Súper Froiz, que tanto fixeron polo noso ciclismo.

    Coñecer as nosas orixes e recoñecer o traballo dos nosos devanceiros é un hábito digno de xustiza que tamén nos axuda a comprender cara onde imos. Neste momento no que o ciclismo galego está a conquistar tantas metas importantes como recuperar a súa competición ciclista profesional e ter un protagonismo histórico na Vuelta a España, cómpre reflexionar todo o que levamos feito para situarnos no lugar no que estamos.

​

 Do 14 ao 17 de setembro, 119 corredores de 17 equipos atravesarán 28 concellos para seguir impulsando o ciclismo galego e tamén, para converterse neses grandes deportistas e persoas homenaxeados que hoxe teñen como exemplo. De seguro, que algún día, serán estes corredores os que reciban o seu merecido recoñecemento.

    Na Xunta de Galicia e na Federación Galega de Ciclismo terán todo o apoio necesario para logralo.