SAÚDAS

    Mellorar a calidade de vida das persoas debe ser a prioridade de calquera rexedor. É un obxetivo complexo, que non sempre se albisca no camiño máis doado ou máis recto, pero é o correcto. Como alcalde da Boa Vila desde hai más de dúas décadas, como médico con anterioridade, sempre tratei de comprobar e mellorar a saúde dos seus veciños e veciñas, ao tempo que facía o posíbel á hora de prever posíbeis doenzas.

   Nese sentido, o deporte é chave, sen dúbida, á hora de fomentar hábitos saudábeis, de crear sociedades mellores e máis sás. O deporte xera benestar, xera vilas con maior calidade de vida, con maior atractivo… hai centos de motivos polos que debemos fomentar o deporte en calquera das súas disciplinas.

   Citas deportivas de gran nivel como a Volta Ciclista son un chamamento masivo á sociedade para que o practique. Amosan ese máximo atlético que unha persoa pode acadar e xera referentes que seguir, ao tempo que é un axente cohesionador, un elemento que permite ver como un veciño ou unha veciña rompe barreiras de todo tipo e chega onde antes ninguén puxo un pé.

   É un orgullo, en nome de todo o concello, que eventos como a Volta pasen polos nosos espazos e se fagan un con nós. Pontevedra sempre dá de beber a quen pasa, e non será menos nesta ocasión.