SAÚDAS
SAÚDA DO PRESIDENTE DA FGC, JUAN CARLOS MUÑIZ
Galicia é o país dos milleiros de festas no verán e a ese calendario incesante de celebracións únese cada ano o Ciclismo Galego co seu gran evento. A Volta Galicia alcanza a súa 21ª edición e a mediados do mes de setembro exerce unha vez máis de festa grande e final do calendario autonómico de estrada. Aquí a música e o baile póñeno os ciclistas dándolle aos pedais, ofrecendo un espectáculo que enche de ledicia moitas vilas da nosa comunidade.
Pobra do Brollón, A Pobra de Trives e Pontevedra son as capitais dun fermoso percorrido. Desde a organización encargámonos de deseñar o escenario e co seu talento os ciclistas fan o resto. Este ano volvemos contar cunha excelente participación, coa presenza de todos os equipos galegos e dende fóra da nosa comunidade chegan formación de moito nivel.
Os corredores da categoría Elite-Sub23 buscan dar o salto ao campo profesional. Con cumprir ese soño non se conformou Gustavo César Veloso. O vilagarcián quixo máis. Durante dúas décadas competiu ao máximo nivel conseguindo converterse nun referente pola súa calidade e pola súa forma de ser. Asinou triunfos inesquecibles como o da etapa da Vuelta a España en Xorret de Catí, a xeral da Volta a Catalunya ou os numerosos éxitos na Volta a Portugal, pero á marxe do seu extraordinario palmarés están os valores que transmitiu. A humildade, o compañeirismo e a súa gran visión de carreira continúan caracterizándoo como director deportivo. Por todo iso, dedicámoslle esta edición da Volta.
Unha das mellores probas do calendario estatal non sería posible sen o apoio das administracións. Temos que agradecer a confianza dos concellos que acollen as etapas, das deputacións das provincias polas que transitará a carreira e da Xunta de Galicia. Ademais, podemos presumir de contar cun grupo de empresas privadas que ano tras ano se involucran con este proxecto.
Gustaríame facer unha mención especial a uns compoñentes esenciais do noso deporte. A Garda Civil de Tráfico vela pola seguridade de toda a caravana, un labor que nunca nos cansaremos de aplaudir. O seu
esforzo, o do persoal sanitario, o dos xuíces árbitros, o dos responsables da montaxe, o dos auxiliares, o dos directores deportivos e, sobre todo, o dos ciclistas converten a este evento nunha festa da bicicleta.
Esta é a vosa Volta, desfrutádea!