SAÚDAS

    A Pobra de Trives terá un papel protagonista na gran festa anual do ciclismo galego. Non podía ser doutro xeito, pois este é o lugar idóneo para acoller a etapa raiña de montaña dunha competición con tanta historia como a Volta a Galicia.

​

    O Concello traballa coa emoción de poder mostrar ao mundo un lugar que sempre deixa unha fonda pegada na memoria de todas as persoas que nos visitan. 

    O empeño por parte do Concello en acoller esta etapa da Volta Ciclista a Galicia ten como obxectivo amosar Trives máis alá dos lindes de Galicia e España, ademais de xerar negocio para a nosa vila. Agardamos 16 equipos, oito da comunidade galega e outros tantos de diferentes puntos do territorio nacional e xunto a eles miles de visitantes que terán ocasión de coñecer algúns dos enclaves máis destacados do municipio.

   Esta festa, a do ciclismo galego, coincidirá tamén coas festas do Cristo e a Dolorosa. Serán días de grande intensidade e desfrute para todos e todas. Como alcaldesa, agradezo á organización a elección deste concello para acoller unha etapa de tal envergadura, a etapa raíña, e por darnos a oportunidade de mostrar ao mundo o enclave máis fermoso da Ribeira Sacra.

   Desexo de corazón que todas as persoas que visiten Trives con motivo deste evento regresen pronto, porque este Concello é un tesouro da historia arquitectónica, cultural e gastronómica de Galicia.