SAÚDAS

É para nós un motivo de grande satisfacción que a nosa querida vila de Xinzo de Limia sexa o escenario da terceira etapa da Volta Ciclista a Galicia. A caravana multicolor partirá e regresará ao corazón da Limia, nun percorrido circular que porá de manifesto a singular beleza e a extensión chairega que caracterizan o noso Concello e a nosa Comarca.

​

O ciclismo é un deporte que conta cunha importante presenza na nosa comarca, con moitas persoas que practican esta disciplina non só como forma de lecer, senón tamén como un medio de transporte sostible e saudable. Xinzo de Limia, coas súas longas chairas e paisaxes abertas, é o lugar idóneo para gozar da bicicleta e queremos seguir potenciando este recurso.

​

A Volta Ciclista a Galicia non só traerá emoción e deporte ao noso Concello, senón que tamén servirá para poñer en valor a nosa vila e promover o uso da bicicleta como un medio de transporte ecolóxico e accesible. Quixera agradecer á Federación Galega de Ciclismo por pensar en Xinzo de Limia para acoller esta etapa tan importante, e tamén a todas as persoas que dun xeito ou outro contribúen a facer que o noso Concello sexa un referente no ámbito deportivo.